Divançe 012 Zehî bahş-i hayât eyler leb-i kevserlerin cânâ

012

1 Zehî bahş-i hayât eyler leb-i kevserlerin cânâ
Kızıl güller olur hayran ruh-i ahmerlerin cânâ
 
Senin bâğ-ı İrem’de gülşen-i sadrın kitâbında
Aceb takrîr eder bülbül hat-ı ezherlerin cânâ
 
Hatından hâl-i hindûler seher goncelerinden hûb
Salındıkça sabâ ile tel-i anberlerin cânâ
 
Yüzündür gülşen-i tevhîd eder âşıkların tasdik
Okudur halka-i zülfün dile ezberlerin cânâ
 
5 Güzel geysûlerin dilber senin husn-i hatındandır
Cemâlin seyr-i cennet kāmet-i ar‘arların cânâ
 
Esîr-i kayd-bend etdin beni ey gözleri âhû
Musavverdir derûnumda perî-peykerlerin cânâ
 
Aceb kim bir vefâ görmüş cihan içre güzellerden
Bakan bu LUTFÎ’ye berrak göz-i ahterlerin cânâ